Kontsumo arduratsuaren alde

Euskadi Gazteak, hilero gai ezberdinen inguruko elkartasun kanpaina egiten du. Hilabete bakoitzean, gai baten inguruko informazioa eskaintzen die entzuleei, eta hori eskertzekoa da. Urtarrileko elkartasun kanpaina, kontsumo arduratsuaren inguruan izango da. Hilabete egokia aukeratu dutela argi dago, Gabonetan sortzen den kontsumo masiboa kontuan hartuta eta orain urtarrilean merkealdiak hasten direla ikusita.

Arduraz kontsumitzea zer den azaltzeaz gain, hainbat aholku ere helaraziko dituzte. Izan ere, norberak erosten dituen ondasunak edota zerbitzuak gizartean eta ingurumenean duten eraginaz ohartarazi nahi dituzte irratiko entzule eta webguneko erabiltzaileak. Gainera, webgunearen bidez, hilero egin ohi duten bezala, sari bat zozketatuko dute eta horretarako webgunean eskuragarri dagoen txartela bete beharra dago.